twenty2yards

Jeevan ke bikhre sire lekar, darpan ke toote tukde lekar
sookhe se ujadi fasal lekar, baadh mein behte ghar lekar
kya karoon me tumhari samvedna lekar?

rishton ki aadhi kadiyaan lekar, deewaron se chhoti seedhiyaaan lekar
aangan mein bikhre phool lekar, aandhi mein udti dhool lekar
kya karoon me tumhari samvedna lekar?

milne ke jhoote vaade lekar, band darwaze ki dastak lekar
greeshm mein julse patte lekar, sheeth mein jame iraade lekar
kya karoon me tumhari samvedna lekar?

woh kabhi na aayi chitthi lekar, woh lautne ke vaade lekar
paane pe chithki siaayee lekar, woh tooti hoyee kalam lekar
kya karoon me tumhari samvedna lekar?

woh udhari hoyee chunari lekar, sringar ki khaali maez lekar
woh haar ki muskan lekar, woh door ki ummedein lekar
kya karoon me tumhari samvedna lekar?

registaan ka sooraj lekar, prashant ka paani lekar
Jeevan ke bikhre sire lekar, darpan ke toote tukde lekar
kya karoon me tumhari samvedna lekar?

|